ភ្នំពេញ៖ នៅក្នុងរយៈពេល ៦ ខែ ឆ្នាំ ២០២៤ នេះ ខ្យល់កន្ត្រាក់បានកើតឡើងជិត២០០លើក បណ្ដាលឲ្យមនុស្សស្លាប់ និងរងរបួសជិត៣០នាក់ និងបំផ្លាញផ្ទះសម្បែងជិត៤ពាន់ខ្នង ព្រមទាំងហេដ្ឋារចនាសម្ព័ន្ធផ្សេងៗ មួយចំនួនទៀត។ឯ.ឧ សុទ្ធគឹម កុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ មានប្រសាសន៍នៅព្រឹកថ្ងៃទី ៣កក្កដានេះថារយៈពេល៦ខែឆ្នាំ២០២៤នេះខ្យល់កន្ត្រាក់បានកើតឡើងចំនួន១៨២លើកនៅទូទាំងប្រទេសបណ្តាលឱ្យរលំផ្ទះធ្ងន់ធ្ងរចំនួន៣៧៥ ខ្នង របើកដំបូលផ្ទះនិងខូចខាតមធ្យមចំនួន៣៣២៧ ខ្នងរបើកដំបូលសាលារៀនចំនួន៣៧ខ្នងតូបផ្សារ
ចំនួន១៧តូប អគាររដ្ឋបាលចំនួន១៣ កន្លែងបណ្ដាលឲ្យមនុស្សស្លាប់ចំនួន៣នាក់និងរបួស២៣នាក់។ឯ.ឧ បានបន្តទៀតថា ចំនួនខ្យល់កន្ត្រាក់ ៦ ខែ ឆ្នាំនេះ បើប្រៀបធៀបទៅនឹងរយៈពេល ៦ ខែដូចគ្នា ឆ្នាំ ២០២៣ កន្លងទៅ ឃើញថា មានការថយចុះគួរឲ្យកត់សម្គាល់ ខណៈ ៦ ខែ ឆ្នាំមុនខ្យល់កន្ត្រាក់បានកើតឡើងចំនួន ២០៤ លើក នៅទូទាំងប្រទេស ។